2016 شفنا فيكى الذُل
والفقر طال الكُل
ولاشفنا فيكى ربيع
ولاحد كان بيبيع
وحلمنا بيضيع
ولاكانش فيه مواضيع
غير هم فوق الهموم
ومر فوق المر
وحمل هم فظيع
هتجيب منين الناس
حتى الفقير محتاس
بين فقره والمواجيع
هنفضل نقول ونقول
ولحد امته نطيع
متعبرونا يا خلق
الناس خلاص بتضيع
مرضانه صابها السُّل
2016 شفنا فيكى الذُل
والفقر طال الكُل
2017 خليكى متطلعيش
بيقولوا اسعارك
هتزيد كمان مره
وهتبدأى بالمر
ولاعادش شىء بيسر
والمصرى مخنوق
عُمره خلاص بيكُر
والخنقه صبحت تقيله
بالنيله فوقها النيله
والناس ماهيش لاقيه
وعجل الهموم بيفُر
بيقولوافيه مشاريع
ويا مصر متقلقيش
وينتِّفوا ف الريش
2017 خليكى متطلعيش
يا مسئولين يا كبار
فين ربنا ف قلوبكم
بتحطوا جاز ع النار
والهم فوق الهم
بيزيد وباستمرار
ياناس كفايه مرار
الناس بتبكى الذل
ودموع بقت انهار
ياخلق هووه الناس
خلاص بقت تنهار
الليل وفوقه ليل
ولاعادش ليها نهار
ولاعاد لنا اعضاء
قاعدين ف مجلس شعب
عاملين لنا ثوار
ولاعاد حكومه رشيده
بتجدد الافكار
راعيين مصالح بعض
حافظين لاراضيهم
حافظين مشاريعهم
بورصه مع استثمار
دايسين علينا يا ناس
وكأننا كُفَّار
يا ربنا الستَّار
الامر كله اليك
تاخد من الفُجار
واللى يغلِّى السعر
تحرقه بالنار
دبرها من عنده
ياعالم الاسرار
يارب واجعلها
تكون بدايه خير
فى كل بيت او دار
واجعلها تبقى سنه
نشوفوا فيها الخير
واغفر لنا ذنوبنا ياربنا الغفَّار
=======
مستر/عطيه الخضرى
2016 شفنا فيكى الذُل
2016-12-17, 21:44
