منك لله ياحبوب الغلِّه
أصلك مكاره
مليانه حقاره
سمومك تجرى
سموم سيَّاره
زى الطيَّاره
بتهدِّى كل جهاز ف الجسم
وتخلى السكر
أضعاف بمراره
مع أنك قِلِّه
منك لله ياحبوب الغلِّه
فوسفيد ألمونيا
تركيبه تودى الناس م الدُّنيا
بتموِّت فورا
موته مشئومه
زى فليب ملك مقدونيا
مات مُغتال
وأنتى بتغتالى
وبتحتالى
لما تلاقى الناس ف الذِّله
منك لله ياحبوب الغلِّه
ليه منسابه
فى كل مكان
ليه موجوده بسعر رخيص
وبالأمكان
ومفيش تجريم
ولافيه تحريم
علشان مهدور دم الأنسان
علشان مقهور
دم الغلبان
ولافيها قانون
ولايوم هيبان
وحكومه نعسانه
بتنام ف الضِلِّه
منك لله ياحبوب الغلِّه
دلوقتى فرادى بيموت الناس
يوم تنساب
وبدون أسباب
بدل الواحد هيموت شِلِّه
منك لله ياحبوب الغلِّه
============
مستر عطيه الخُضرى
قلين -كفر الشيخ
منك لله ياحبوب الغلِّه
2019-07-26, 05:57
