أحسن ناس بتنافق
أحسن ناس بتوافق
أحسن ناس كُرما
زى النهر الدافق
أحسن ناس بتبوَّظ أى مرافق
أحسن ناس بتلاقى ما بينهم
اللى معارض واللى موافق
أحسن ناس بتعيش ع الزيف
أحسن ناس ف فن التأليف
بتلاقى فينا دم تقيل
وتلاقى برضه دم خفيف
أحسن ناس ف مدينه وريف
وتلاقى ناس منهم يا لطيف
ناس تلقاها جميله بجد
وناس محتاجه
العمر بحاله شامبو وتشطيف
ناس تديلك كل اللى معاهم
وناس تلقاها زى الخطاطيف
أحسن ناس بتطبل أحنا
أحسن ناس بتهبل أحنا
أحسن ناس بتشرَّق
وأحسن ناس بتقبِّل أحنا
أحسن ناس بتغنى
وأحسن ناس بتسبِّل أحنا
أحسن ناس بتجرَّح
وأحسن ناس بتفرَّح
وأحسن ناس بتخبِّل أحنا
أحسن ناس بتعوَّر
أحسن ناس بتصوَّر
أحسن ناس تتهوّر
أحسن ناس ع الشُهره تدوَّر
أحسن ناس بتخلى المواضيع
تكبر تتطَّور
وتشطشط تتبَّل أحنا
أحسن ناس بتخلِّف
أحسن ناس تتسلِّف
أحسن ناس بتولِّف
أحسن ناس بتحلِّف
أحسن ناس بتكلِّف
وأحسن ناس للحزن تغلِّف
وأحسن ناس بتحبل أحنا
فينا طيابه
وفينا خيابه
وفينا ملايكه
وشياطين وديابه
سايبين الدُّنيا ماشيه ومنسابه
ناس صادقه بجد
وناس كدَّابه
لكن ف الأخر
تلقى اللى معاه
واللى ماهوش لاقى
الكُل غلابه
جوه قلوبنا الخير والله
مهما زهورنا تنشف تتدبِّل أحنا
ومهما كُنا أو هُنَّا
لازم نرجع ونستغفر
لعل الرب يتقبِّل
====================
مستر/عطيه الخُضرى
قلين -كفر الشيخ
لازم نرجع ونستغفر لعل الرب يتقبِّل
2019-06-28, 00:41
