أنتوا يا ناس ياللى ماسكينها
ليه ناسيين الناس مساكينها
ليه سانِّين ع الناس سكاكينها
ليه بايعينها
ليه حالفين لتطلعوا عينها
مش عايزين الناس تسكينها
الناس تعبانه
وهموم الناس مش محتاجه غير تسكينها
شَكِّه ف قلب كبير وصغيِّر
زى قلوب الناس اللى شكِّينها
رب الكون هيقوِّى الناس
ومن رقابيكم هيمكِّينها
وهياخد حق الفقرا بجد
على قد دموع الناس
اللى مبكِّينها
أخرتكم جايِّه
ومسيرها تزول
وكل الناس تفتح دكاكينها
ومصر هترجع تانى عفيِّه
ومش هتموت
ولاهتنولوا ف يوم تكفينها
والأغنيه هتعلى بجد
وهنستمتع بأحلى كلامها
وبتلحينها
والخطط البايظه مش بلعينها
علشان رب الكون موجود
هو اللى حافظَّها واللى يعينها
دمعه كل فقير مسكين
راح تبقى جينات داخل تكوينها
راح تبقى زهور علشان تلوينها
ويوم ما تنادى بلدنا علينا
راح نتحول لكرات دم
تجرى ف شرايينها
دا لحم كتافنا يا ناس من طينها
وما نستحمل دمعه ف عينها
علشان اولادها أحنا وفراعينها
أكلنا طحينها
وخلعنا طخينها
ومش راح نسكت
على أى حكومه بتفسد فيها
وتفرَّق دينها
محنش سردينها
وأى حكومه مش راح تخدم
كل بلدنا
راح ياكلوها من مصارينها
=======
مستر/عطيه الخضرى
قلين - كفر الشيخ
الناس تعبانه
2016-09-28, 11:52
