أه يا فيس يا أبو وشِّين
الوش الأول
=====
يافيس وطيِّب
وحويت أفاضل طيبين
ناس ترد بأحترام
وبحب بترد السلام
وناس تساعدك
من غير ما حتى تعرفك أنته أبن مين؟
وناس تنادى بالفضايل
وبحكمه تعدل كل مايل
وناس تقول أفكار جميله
أقل ما فيهم يتقال عليه
وبصدق هايل
وناس بتحب تخدم وبس
تلقاه لهم غيره شايل
وناس بتعرض موضوعات
للخير وبس فى كل حين
وناس تسامح
وناس طيبه قلبها تبان م الملامح
وناس تحس انها حتة نسيج
خليط بحب مابين مرقص ومحمد وسامح
وناس تمد أيد محبه لكل طامح
وأيد تطبطب بأحترام على كل جامح
وتشوف حلاوه طبعها من كلمتين ومكتوبين
الوش التانى
---------
يافيس عِفش
لمِّيت أرازل
وفيك مهازل
وضاعت الاخلاق يا فيس
ولاعدش ليها قانون وعازل
خلَّيت الحب ضعيف مُتخاذل
والاخلاق دوما ف النَّازل
والأحساس ولَّى وطِفش
يافيس عِفش
تعرض رأيك من غير تجريح
وتقول رأى صحيح وصريح
تلقى الرد سادد ف ودانك
وكأنك بتقول من علبه صفيح
تلقى التأليس ويَّا التلقيح
والكل خلاص لقه نفسه فصيح
وتلاقى الرد بقه رد قبيح
من غير تلميح
ولاتلقى ف مره
ثناء ومديح
ما أصله فحيح
تعبان وبيقرص
وف قلب جريح
الفيس يا جماعه
صوت الغلبان
حبِّة تفاريح
وأهو تنفيس
وكلام ف الرِّيح
فيها ايه لو قلنا كلام ومفيد
ونجمع بعض الايد ف الايد
من غير هتافات
من غير ترديد
نشوف مشاكلنا
ونقولها حلول
بتخلى الخير ف بلدنا يزيد
ونشوف مصالحنا
بدل التسديد
نفتح ف قلوبنا
أفراح العيد
ونزرع ف امال
بدل التهديد
===========
مستر/عطيه الخضرى
قلين –كفر الشيخ
أه يا فيس يا أبو وشِّين 
2016-08-25, 20:51
