بلدنا مصر
دى وطن بيقوم عفى
ولاعمره يوم راح ينكفى
ولاشمسه يوم راح تنطفى
طول عمر قلبه صادق وفِّى
يقوم صحيح اقوى
لو حتى كان متهالك
لودمعه متحجره
مش لاقيه المسالك
لوناس نست ربها
مبقيتش بتحبها
راح تفضلى ف حفظه
وانته اللى باقيه يامصر
مع ان الكل هالك
ياربه الصون والعفاف
اوعاكى تبكى ف يوم
ويقول الكل مالك
طول عمر راسك فوق
و الحب ويا الشوق
ف قلوبنا منشالالك
وكلمة من قلبنا
بالدم بنقولهالك
بنحبك يا مصر
يا اعز من وِلدِنا
ياللى مفيش امثالك
ولا ف العالم مثالك
بنعشق تراب ارضك
وبنعشق ابداع عيالك
وبنعشق حتى كورتك
فى الاهلى والزمالك
قومى اثبتى
قومى يا منبت عيالى ومنبتى
اغسلى رجلك ف نيلك
اوعاك يوم تتلغبطى
قولى لولادك يا غاليه
صوتكم امانه
اوعوا ترضوا ف يوم مهانه
اوعى ترضوا
لامكم تانى الاهانه
شايفه يامه
شايفه الولاد
اللى قاعدين ع القهاوى
اللى قاعد ومش حاسس بنفسه
واللى بيغنى ف غناوى
واللى هادى واللى ناقم
واللى عامل حرّيِف وحاوى
واللى بيحب الحكاوى
واللى للعفريت مخاوى
واللى مش لاقى صحن فول
واللى يتغدى بكلاوى
كل دول من حقهم
فى عمل شريف
ومسكن نضيف
بيلمهم
عايزين ولاد يتجمعوا
وياخدوا واحد منهم
ياخدوا واحد زيهم
بيحسهم
من دمهم
مش بعد حَبه
و يعمل عليهم عمهم
ويحققوا ويدققوا
عشان خاطرهم
ولجل خاطر امهم
متقولى يا امه
كلمه صراحه
عمرنا ما هننسهالك
===============
مستر/عطيه الخضرى
بلدنا مصر
2015-10-16, 09:28
