حكام بلدنا بيدبحونا
لو قُلنا رأى يسجنونا
أسجنوا معانا الولاد
وأقتلونا
موتونا
وموتوا معانا العيال
وأدفنونا
كفنوهم كفنونا
ملعون أبونا
وحتى ملعون اللى يوم
حب الوطن علمونا
لحد أمته هتخدعونا؟
بالله عليكم فهمونا
كان قبلكم كل الفساد
ف الدوله ساد
كان فيه كساد
لكنهم مكنوش ف يوم بيجوعونا
وكُنَّا عايشين ع المعونه
وع الأقل كانوا برضه بيسمعونا
ولامره كانوا بالأهانه يحسسونا
فينك ياريِّس
المسئولين بيقطعونا
بيزهقونا
عايزين يا ريِّس يحلبونا
طلَّع قرارك
غير ياريٍّس
يمكن ف مره هيراعونا
المسئولين يارئيسنا بيسرقونا
لو عليهم يحرقونا
فين ياريس حقنا
وحق اللى ماتوا وشرفونا
حقهم هو الأمل
والمسئولين فى اى شده يلحقونا
لكنهم ماتوا وبلاش
والمسئولين
من كل شىء يا رئيسنا جردونا
بياكلوا فينا
يعجنونا ويخبزونا
وكل مسئول ف البلد
واخد ف نفسه مليون ليمونه
المسئولين يا رئيسنا
من كل البلاوى بيدوقونا
سدُّوا الأمل
ولاعادش فيها طاقه أو رزونه
بيبيعوا فينا
وحته حته بيوزنونا
لو ضحكنا بس لحظه
يحلفوا مش هيسبونا
ويفضلوا يتفننوا
لحد ما يحزنونا
بيغلوا ف الأسعار ياريِّس
قصدهم هيشحتونا
وأحنا خِلقه بنشحتوا
مش لسه هم هيجبرونا
معدش فيه حادق أو زتونه
قصدهم قال يكسرونا
يا رئيسنا مسئولينا
بيرهبونا
بيقهرونا
ولاهان عليهم يسمعونا
بالله عليك يارئيسنا
قول لهم يرحمونا
خلاص ياريِّس
أتعدمنا وقربت
تنفجر تانى البالونه
=========
مستر/عطيه الخضرى
قلين –كفر الشيخ
أتعدمنا وقربت تنفجر تانى البالونه
2017-03-21, 03:56
