موال لرواد الفضاء
لصلاح جاهين

سألت عن بختى ، قالوا النجم له أحكام ،

نجمك فى يوم يرفعك ، و يضعضك أيام ،

إن مال يمين تتنصف ، و إن مال شمال تنضام ،

و إن تروق دنيتك ، و باداهيتك لو غام .

نزل الطاعون ع البلد، قالوا النجوم تتلام ،

و الحرب قامت ، قالوا لنا : نجم و ابن حرام ،

واقف فى وسط السما ، شاهر علينا حسام ،

نجوم و ياما قصص .. و نجوم ، و ياما كلام ..

و فجأه فجأه كده ، فجأه مفاجأة تمام ...

انقض م الأرض ع الملكوت ولد ضؤغام ،

رائد فضاء .. و اللى بعده .. و بعده .. صبحوا زحام .

احنا البشر فين ، جوم السعد تيجى قوام .

ياللى انتو فوق ، اسبحوها عندنا بنظام ،

و زقوا نجم الحروب ارموه فى برج سلام .

و أما نجمى أنا ...

قولو له يضحك لى ..

و نفضوه لو سمحتم .. إن لقيتو غيام