جناب مُحافظ كفر شيخنا
كترت شروخنا
وكل مسئول ف البلد
نازل بهمه فوق نافوخنا
ولا فيه رقيب ولا فيه ضمير
حتى الضمير اللى ف شيوخنا
شبابنا قاعد ع القهاوى
ولافيه عمل
ولافيه أمل
وكل شىء اصبح جنابك
علقم ومر وغير مُحتمل
ولاحلم لينا يوم أكتمل
أحنا الشباب
لكن همومنا كُلَّها
خلتنا شيخنا
جناب محافظ كفر شيخنا
كام مؤتمر بأسم الشباب
لكن هباب
وكلام سراب
والحاله زايده ف الخراب
واحنا اللى قالوا عننا
أعلام كبار وأقرا تاريخنا
جناب محافظ كفر شيخنا
يا ما اشتكينا
وياما بكينا
ولاحد سمع ف مره لينا
ولاحد مخلص يحتوينا
كل مسئول بيعادينا
وكل ريس للمدينه
أستهزا بينا
وف الهوا بيضيع صريخنا
جناب محافظ كفر شيخنا
قُلنا أنجاز عملته
ولا أى رئيس مدينه لو سألته
راح يعلى صوته
ويقول كلام كله سراب
عشان يدارى ف انفعالته
وكاننى لغداه أكلته
أو قتلته
والله دوخنا
جناب محافظ كفر شيخنا
ولافيه رقابه ف الاسعار
والدوا غالى ومرار
ومجبرين ومعدش قدامنا أختيار
ولاعدش فيه جنه ونار
كلنا قدامنا نار
ومسئوليننا ف العسل
ومفيش قرار
ف يوم يفرَّح قلبنا
من بعد طول الانتظار
وأحنا والله أتلبخنا
جناب محافظ كفر شيخنا
الناس بقت متكدَّره
وكل حته ف البلد جايبه لورا
والنفوس ويا الضماير
خلاص بقت متغيره
والشوارع ف البلد متكسره
وقلنا يامه
ولافيه نفوس متأثره
نفس السياسات القديمه
نفس الشخوص متكرره
وكأننا ليها نسخنا
جناب محافظ كفر شيخنا
========
مستر/عطيه الخضرى
قلين –كفر الشيخ
جناب مُحافظ كفر شيخنا
2017-03-05, 07:30
