معجزة – عودة صلاح الدين
مصطفى الجزار
ملتقى رابطة الواحة الثقافية
===========
في القرآن ربّك قال للناس: "ادعوني"
علشان هوا كريم وبيِدّي
وف رمضان الناس بتصلّي
تملا الجامع في التراويح
وإْمامهم يدعي ويعيّط
واللي وراه بيقولوا: "آمين"
عارفين كانوا بيدعوا بإيه؟
كانوا كل صلاه بيقولوا:
يا الله
رجّع لينا صلاح الدين...
يا الله
دا احنا بشوق مستنيّين
يا الله
لو جالنا هنقوم واقفين
يا الله
نمشى وراه ونكون طايعين
يا الله
و نحرّر أرض فلسطين
يا الله
بس ييجيلْنا صلاح الدين
يا الله...
*******
ربك دايماً..
ربّ قلوب
بيحبّ العبد اللي بيطلب
وامّا لقى الملايين بيقولوا
رجّع لينا صلاح الدين
سبحانُه.. حقّق رغبتهم
ولقينا الأرض بتنشقّ...!!!
قُدرة ربّك
مين هيكدّب ويقول: "لأ"؟!
ولقينا فارس من نور
وحصانه بيجري ويْدُور
وف إيده السيف المتعافي
استعجِبنا...!!!
وسألناه: "انت اسمك إيه؟!"
قال بالفُصحى:
أنا يا قومِ صلاحُ الدينْ
قد أحياني اللهُ القادرُ
حين دعوتم
أنْ يبعثَني اللهُ إليكم
ها أنا ذا
قد جئتُ إليكم
لكنْ نُبّئتُ بأخبارٍ عنكم سيّئةٍ للغاية
كيف رضيتم أن يُنتهَك الأقصى فيكم؟!
كيف سمحتم للأعداءِ بهذا الأمر؟!
كيف تركتم بيتَ المقدس؟!
كيف قَبِلْتُم عَيْشَ الذلّةِ بينَ الناسْ؟!
إنى مِتُّ وأرضُ القدسِ مُطهّرةٌ من كل خبيث
وتركتُ الأقصى من زمنٍ.. منصوراً.. مرفوعَ الراسْ
فتنازلتم أنتم عنه... للأنجاسْ!!
لكن... لا بأسَ... فقد عُدْتُ
وسنُرجِعُ جيشَ الإسلام
جيشٌ سوف يقودُ العالَم
أنتم.. جُنده..
هيا قوموا...
سوف نحاربُ.. حتى الموتْ
هل مِن أحدٍ يُبدي رأياً فيما قُلت؟"
*******
كل الناس كانت ف ذهول
م اللي بيحصل
واحد فيهم
اتقدّم لصلاح الدين
قال: "اسمحلي
إنت صلاح الدين وانا عارف
لكن آسف...
ما اقدرش أحارب ويّاك
أحسن أنا على وِشّ جواز
عايز اشوفلي يومين ف الدنيا
أبقى عريس..
أفرح واتمتّع و أهِيص
لكن حرب؟!!!
سلامُو عليكم... أنا مش فاضي"
*******
واحد تاني
قال: "اسمحلي يا عَمّ صلاح
إني ما اروحش الحرب معاك
عندي عيال عايز اربّيهُم
وانا غلبان
باقْطَع من جسمي وبادّيهُم
لو رُحت معاك -افرض يعنى-
مين هيأكّلهم مِن بَعدي؟
مين -لو رُحت معاك- يراعيهُم؟
أنا عارف.. ربنا موجود
هوا اللي بيرزُق... مش إحنا
بس انا خايف
والبَرَكه ف باقي الرجاله
هُمّا يسدّوا بدالي هناك
وانا هادعيلكُم كل صلاه"
*******
واحد تالت
قال: "انا تاجِر
عندي المصنع والدكّان
ومشاغِل أشكال والوان
أبقى عبيط لو سِبت مصالحي وْجيت ويّاك
لكن هابقى معاكو بقلبي
*******
واحد رابع...
واحد خامس...
سادس...
سابع...
عاشر...
ألف...
كل الناس قالوا: "آسْفين
رُوح وحدك يا صلاح الدين
أحسن إحنا مش فاضيين
لا لجيشك ولا لفلسطين
إيه يعنى أقصانا سجين؟
ما هو في السجن بَقَالُه سْنين
لو بالحرب هنُنصُر دِين...
يِبقى خلاص ما احناش عايزين
إحنا هنقعد منتظرين
وهندعيلَك بالملايين:
يا الله
إِبْعِد عنا صلاح الدين
يا الله
إحنا بحالنا كده راضيين..

ملا حظه:معذرة للشاعر
و لكن في إعتقادي أنه مخطئ
لازال الخير في أمة محمد
و لكننا نحتاج لمن يفيقنا
بدليل وجود أفضل المجاهدين في حماس
و الذين ساروا خلف قادتهم و أطاعوهم و باعوا في سبيل الله و الوطن كل غال و نفيس
لو وجد صلاح الدين بإيمانه القوي و عزيمته
و إستماتته في العمل لرفعة دين الله و إنتشاره في كل أرض الله
و احتواءه لشعبه و جنوده و خوفه على مصالحهم و حرصه على أن يكونوا مسلمين مؤمنين حق الإيمان
لوجدنا الملايين من شباب المسلمين يتبعونه و يحملون أرواحهم على أكفهم في سبيل الله و الوطن
و لكننا دائما ما نجلس لننعي حالنا و حال شبابنا
و لا نفكر فيما أوصلهم لهذا الحال
قديما أرجعنا انتصارات المسلمين للقادة من أمثال عمر بن الخطاب و خالد بن الوليد و صلاح الدين و قطز و بيبرس
و الآن نرجع هزائمنا و خيبتنا للشباب و ليس لقادة العرب أخزاهم الله و خلصنا منهم
صدقوني لو وجد قائد في دولة عربية واحدة يحمل نصف صفات صلاح الدين
و شجع أئمة المساجد و شيوخ هذا البلد على بث الدين و انتشاره في الشباب
و حث على تطبيق شرع الله في كل مكان و زمان
لوجدتم شعبا غير الشعب و ناسا غير الناس
لوجدتم شعبا مسلم يطيع الله و يسير على سنة رسوله و صحابته
يجود بكل غال من أجل نصرة دين الله و انتشاره في أرضه
و لكن الآن القادة يحاربون الدين و علماؤه
و يسخرون كل جهودهم لتحريفه و إبعاد الناس عنه
و ينشرون الملذات و الملهيات بكل طاقتهم لينغمس الشباب فيها
فلم اللوم على الشباب ؟؟؟؟؟؟؟؟
حسبنا الله و نعم الوكيل
اللهم أبدلنا خيرا منهم و خلصنا من ظلمهم
اللهم ارزقنا صلاح الدين فأنت القادر على ذلك
مرة أخرى معذرة للشاعر و لكني أراه غير محق